من اين ابدأ بتعلم المونتاج ؟

#من_اين_ابدأ_بتعلم_المونتاج؟

دائماً مايسألوني بعض الاصدقاء المصورين او الي حابين يدخلون بمجال المونتاج فحبيت اجاوب بصورة عامة عن هذا التساؤل ! ولخصت اهم النقاط الاساسية الي لازم تعتمدها حتى تتعلم المونتاج بأسهل واسرع طريقة : 

اولاً : لازم يكون عندك كمبيوتر شخصي قوي سواء كان دسكتوب او لابتوب طبعاً مو شرط يكون قوي كلش بس المهم يتحمل المونتاج الخفيف الي راح تشتغله مثلاً المواصفات التاليه كحد ادنى : 

Core i7

Ram 8 Gb

Gpu 1Gb

هذه المواصفات بالبدايه مراح تواجه بيها مشكله لكن بمرور الوقت لازم تحول الى شي محترف . 

ثانياً : اختيار برنامج المونتاج المناسب الك : بالبداية لازم نتفق على انو جميع برامج المونتاج نفس مبدأ العمل وحتى من ناحية واجهة البرنامج لكن اكو اختلافات بسيطة بالادوات داخل البرنامج اكو هواي برامج للمونتاج مثل ادوبي بريمير وسوني فيغاس وفاينل كات ، لكن اسهل وافضل البرامج الي ارشحها الك والي اشتغل عليها بشكل يومي هو ادوبي بريمير ، طبعا البرنامج غني عن التعريف . 

ثالثاً : الصبر والتركيز ، لازم بالبداية راح تواجهك صعوبات بتعلم المونتاج بس لازم تصبر وتركز صدكني راح تشوفه كلش سهل ، محد اجه للدنيا يعرف مونتاج وكل البشر عدهم تقريباً نفس قابليات التعلم . 

رابعاً : التغذية البصرية والي هيه اهم عنصر اني اشوفه للاحتراف بهذا المجال ، يعني تابع افلام ومسلسلات خصوصاً الاجنبيه راح تتعود عينك وتتغذى على قطعات اللقطات وتنسيقها بالاضافة راح تتغير طريقة مشاهدتك للافلام . 

هذه اهم النقاط الي لازم تعرفها عن بدايتك بتعلم المونتاج اذا استفاديت من هاي المعلومات شاركها مع اصدقائك حتى الكل يستفاد . واذا عندك اي استفسار اكتبه بالتعليقات ايضاً راح اخلي بأول تعليق رابط سلسلة تعليم المونتاج على اليوتيوب 

تابعني على تويتر

راح تكون سلسلة معلومات عن التصوير الفوتوغرافي وتعديل الصور حصرياً على تويتر